Toshkent davlat iqtisodiyot universiteti Samarqand filialida “Ommaviy madaniyatning salbiy oqibatlari” mavzusidagi tadbir tashkil etildi.
Joriy yil 15-mart kuni bo'lib o'tgan ushbu tadbirda, X.Turdibekov – Yoshlar masalalari va maʼnaviy-maʼrifiy ishlar boʻyicha direktorning birinchi o‘rinbosari, G‘.Qurbonov – ijtimoiy-ma’naviy muhit barqarorligini ta’minlash bo‘yicha direktor maslahatchisi, D.Shodmonov - Filial profilaktika inspektori, shuningdek, Filial yoshlar bilan ishlash, ma’naviyat va ma’rifat bo’limi boshlig’i Y.Isomiddinov,professor-o‘qituvchilar, tyutorlar hamda 110 nafar talaba-yoshlar qatnashishdi.
Tadbirni Toshkent davlat iqtisodiyot universiteti Samarqand filiali Yoshlar masalalari va maʼnaviy-maʼrifiy ishlar boʻyicha direktorning birinchi o‘rinbosari X.Turdibekov kirish so‘zi bilan ochib, kun tartibidagi mavzu bilan ishtirokchilarni tanishtirdi.
Shuningdek, Jahonda rivojlanish jarayonlari kundalik hayotimizga tez sur’atlar bilan kirib kelishi, hozirgi sharoitda mafkuraviy ta’sir ko‘rsatishning o‘tkir quroliga aylanib bormoqda.  Bu esa G‘arbdagi har-xil siyosiy kuchlarning manfaatlariga xizmat qilib “ommaviy madaniyat” va “ erkinlik va demokratiya” degan niqoblar ostida axloqiy behayolik, indivudializm g‘oyalarini tarqatishni maqsad qilib qo‘yib boshqa xalqlarning shu jumladan, O‘zbek xalqining ham ko‘p ming yillik ma’naviy, madaniy qadriyatlariga bepisandlik qilib, ulardan voz kechishga undamoqda.
Bunday yovuz maqsadlar “erkinlik va demokratiyani olg‘a siljitish” niqobi ostida amalga oshirilmoqda. Bu kabi harakatlar xalqimizning muqaddas ma’naviy fazilatlari bo‘lgan ibo va hayo, oila muqaddasligi kabi qadriyatlarimizga salbiy ta’sir qilishi shubhasizdir.
Tadbir davomida G’.Qurbonov so'zga chiqib ushbu fikrlarni bildirib o'tdi – Muhtaram Birinchi Prezidentimiz Islom Karimov “Tabiiyki, “ommaviy madaniyat” degan niqob ostida axloqiy buzuqlik va zo‘ravonlik, individualizm, egotsentrizm g‘oyalarini tarqatish, kerak bo‘lsa, shuning hisobidan boylik orttirish, boshqa xalqlarning necha ming yillik an’ana va qadriyatlari, turmush tarzining ma’naviy negizlariga bepisandlik, ularni qo‘porishga qaratilgan xatarli tahdidlar odamni tashvishga solmay qo‘ymaydi” deb bejiz ta’kidlamaganlar.
Hozirgi davrning yoshlari o‘ziga xos bo‘lgan “tushunchalar urushi” sharoitida, ularning keskin tus olgan vaqtida yashamoqdalar. G‘arbdan kirib kelgan, haqiqiy madaniyatga umuman aloqasi bo‘lmagan, “Ommaviy madaniyat” atalmish, bu ajnabiy holat barchani bir tusga, bir qolipga, bir xil ko‘rinishga, bir xil fikrlashga, bir xil turmush tarziga odatlantirishga, urf-odatlarimizdan, mentalitetimizdan yuz o‘girtirishga chiranmoqda, ota-bobolarimiz “qora” degan narsalarni “oq”, “oq” degan narsalarini “qora” deb uqtirishga harakat qilmoqda.
"Ommaviy madaniyat”ning manbalari:
Turli virtual (kompyuter) o‘yinlar, ayrim chet el va xususiy studiyalarda olingan o‘zbek filmlari, tum-taraqay, ma’no-mazmunsiz qo‘shiqlar, chet el telekanallarining ayrim ko‘rsatuvlari, internet va undagi turli ijtimoiy tarmoqlar, Uyali aloqa telefonlari, sariq matbuot, urbanizatsiya jarayoni, isrofgarchilikka yo‘l qo‘yilgan tantanalar va to‘ylar hamda yolg‘on axborot va ma’lumotlarni tarqatuvchi OAV.
Bugungi kunda yurtimizda istiqomat qilayotgan yevropa millatiga mansub yoshlar orasida ko‘proq tarqalayotgan “emo”, “got” kabi submadaniyat yo‘nalishlarini targ‘ib etuvchi 10 dan ortiq internet saytlari ishlamoqda.
Shunday ekan, inson o‘zida bunday madaniyatga qarshi immunitetini qanday tarbiyalashi va buning uchun nima qilishi zarur? Azaliy bo‘lgan, ming yillik sinovlardan o‘tgan qadriyatlarimiz, urf-odatlarimizni mukammal bilish va amal qilishi darkor. Mabodo shunday vaziyatga, holatga tushib qolsa, hech bo‘lmaganda “Bu ko‘rinishdagi “madaniyatni kim, qanday maqsadda va nima uchun uzatayapti?”, degan savollarni o‘ziga o‘zi berishi, unga asosli javob topishga harakat qilishi kerak bo‘ladi. Ana shundagina turli g‘oyalar, shubhali “madaniyatlar” ta’siriga tushib qolish, taqdim etilayotgan ma’lumotlarga ko‘r-ko‘rona ergashishning oldi olinadi. Shakllangan axborot iste’moli madaniyati milliy manfaatlarimiz va qadriyatlarimizga zid bo‘lgan xabar, ma’lumotlar va “madaniyat”ga nisbatan o‘ziga xos qalqon rolini o‘taydi, shaxs dunyoqarashi va xulqidagi sobitlikni ta’minlashga xizmat qiladi.
Shundan so‘ng “ommaviy madaniyat” to‘g‘risida hujjatli film namoyish etildi. Talaba-yoshlar tomonidan berilgan savollarga soha mutaxassislari to‘liq javob berib o‘tdilar. 
Ushbu yig'ilish nihoyasida quyidagicha xulosalar qilindi:
- Toshkent davlat iqtisodiyot universiteti Samarqand filialida “Ommaviy madaniyatning salbiy oqibatlari”  mavzusida ma’rifiy tadbir muntazam o‘tkazilib turilishi belgilab qo‘yilsin.
- “Ommaviy madaniyatning salbiy oqibatlari” mavzusidagi axborotlar filial murabbiylik soatlarida muntazam tarzda talaba-yoshlarga yetkazib borilsin (Mas’ul: Dekan, kafedra mudirlari va guruh tyutorlari).