Yevropa Ittifoqi Oʻzbekiston va Qirgʻizistonda sifatli qishloq xoʻjaligi mahsulotlari barqaror ishlab chiqarishni ta’minlaydigan tarmoqlarni qoʻllab-quvvatlashga qaratilgan oliy ta’limni modernizatsiya qilishga oʻz hissasini qoʻshmoqda.
2023-yil 5-6-oktyabr kunlari Qirgʻiziston Milliy agrar universitetida (manzili: 720005, Qirgʻiz Respublikasi, Bishkek shahri, Mederova koʻchasi, 68-uy) “Qirgʻiziston va Oʻzbekistonda qishloq xoʻjaligi va boshqa tegishli tarmoqlar sohasida oliy ta’limni modernizatsiya qilish” masalalariga bagʻishlangan xalqaro forum boʻlib oʻtadi. Forum “Qirgʻiziston va Oʻzbekistonda barqaror agrooziq-ovqat mahsulotlarini ishlab chiqarish tizimini rivojlantirishga oliy taʼlim muassasalari qoʻshadigan hissa” (AgroDev) loyihasi doirasida tashkil etiladi.
Forum ishtirokchilari “AgroDev” loyihasi boʻyicha amalga oshirilgan ishlar natijalarini sarhisob qiladilar, oliy ta’lim sifatini yanada oshirish va oziq-ovqat sanoati ehtiyojlariga javob berishini ta’minlash uchun zarur chora-tadbirlar va shart-sharoitlarni birgalikda oʻzaro maslahatlashib olishadi, professor-oʻqituvchilar tarkibi hamda bitiruvchilarning bilim va koʻnikmalari darajasi, ularning malakasini oshirishdagi toʻsiqlar va shartlarni muhokama qilishadi, shuningdek, Markaziy Osiyo va Yevropa Ittifoqi akademik va ilmiy doiralari oʻrtasidagi hamkorlik masalalarini koʻrib chiqishadi.
Forumda tegishli davlat organlari (standartlashtirish organlari, Oʻzbekiston va Qirgʻiziston taʼlim, iqtisodiyot va qishloq xoʻjaligi vazirliklari), oliy oʻquv yurtlari (Markaziy Osiyo va Yevropa Ittifoqi davlatlari), tarmoq birlashmalari va biznes doiralari (ishlab chiqaruvchilar, qayta ishlash korxonalari va korxonalari, qishloq xoʻjaligi mahsulotlarini eksport qiluvchilar) vakillari ishtirok etishi kutilmoqda.
Tegishli davlat idoralari, oliy oʻquv yurtlari va xususiy tarmoq (agrobiznez) oʻrtasida quyidagi masalalarni hal etish boʻyicha uzoq muddatli barqaror hamkorlikni yoʻlga qoʻyish imkoniyatlari va zarur chora-tadbirlarini muhokama qilishga alohida e’tibor qaratiladi: tarmoqqa mos yuqori malakali kadrlar tayyorlash masalalari; Qirgʻiziston va Oʻzbekistonda ta’lim, fan va biznes oʻrtasidagi hamkorlikning eng samarali mexanizmlarini aniqlash.
Ushbu forum Yevropa Ittifoqining ERASMUS+ dasturi tomonidan moliyalashtirilgan AgroDev loyihasi konsorsiumi tomonidan tashkil etilgan. Loyihaga Latviya Tabiiy fanlar va texnologiyalar universiteti rahbarlik qiladi. AgroDev loyihasi Oʻzbekiston va Qirgʻizistonda milliy qishloq xoʻjaligi mahsulotlarini ishlab chiqarish tizimini rivojlantirish uchun oliy ta’limni modernizatsiya qilishga qaratilgan.
Qoʻshimcha ma’lumot va ishtirok etish boʻyicha savollar uchun quyidagi elektron pochta manziliga murojaat qiling: aijan.tolobekova@gmail.com; nurila.knau@gmail.com, aslanov@hilfswerk.tj
