Oliy va oʻrta maxsus taʼlim vazirligi tomonidan normativ-huquqiy hujjatlar loyihalari muhokamasi portaliga joylashtirilgan Hukumat qarori bilan talabalarni alohida qobiliyat va iqtidorlari uchun stipendiyalarga qoʻshimcha ravishda 50 foizgacha miqdorda ragʻbatlantirish uchun saralab olish mezonlari tasdiqlanishi kutilmoqda.

    Unga koʻra, talabalarning iqtidor va qobiliyatlari quyidagi mezonlar asosida baholanadi:

    - oliy taʼlim muassasasidagi tahsil davrida respublika va xalqaro miqyosdagi ilmiy jurnallarda yakka mualliflikda maqolalar chop etganligi uchun;

    - yaratgan innovatsion yechimlari va ishlanmalari turli grantlarga nomzod sifatida taqdim etilganligi va unga loyiq topilganligi uchun;

    - taklif qilayotgan (ishtirok etayotgan) startap loyihalari uchun;

    - intellektual mulk obʼektlari, jumladan sanoat mulki obʼektlarini yaratishdagi ishtiroki uchun;

    - xalqaro va respublika miqyosidagi yakka va jamoaviy tartibda oʻtkazilgan sport musobaqalari, koʻrik-tanlovlar, fan olimpiadalaridagi ishtiroki va sovrinli oʻrinlardan birini egallaganligi uchun;

    - axborot-kommunikatsiya texnologiyalari sohasidagi erishgan yutuqlari, jumladan dasturiy taʼminot mahsulotlari, veb-ilovalar va boshqalarni ishlab chiqayotganligi uchun;

    - oʻzi taʼlim olayotgan oliy taʼlim muassasasini respublika miqyosida tanilishida qoʻshayotgan hissasi uchun.

    - “Moddiy ragʻbatlantirishga tavsiya etilgan talabalarning koʻrsatkichlari ushbu mezonlarning istalgan biriga toʻgʻri kelgan taqdirda ularga nisbatan ragʻbatlantirish berilishi mumkin”, deyiladi, hujjat loyihasida. 

    - Qayd etish lozim, amaldagi tartibga muvofiq, Oʻzbekiston yoshlar ittifoqining boshlangʻich tashkilot yetakchisi boʻlgan bakalavr va magistratura bosqichi talabalariga bazaviy stipendiyaning besh baravari miqdorida har oylik qoʻshimcha haq toʻlanadi.

    - Shuningdek, 

    - toʻliq davlat taʼminotida boʻlgan yetim bolalar;

    - ota-ona qaramogʻidan mahrum boʻlgan bolalarga taʼlim olish va oʻzlashtirish koʻrsatkichidan qatʼi nazar bazaviy stipendiyaning 50 foizi miqdorida har oylik qoʻshimcha haq toʻlanadi.