“Iqtisodiyotni barqaror rivojlantirishda raqamli texnologiyalar: muammolar, innovatsiya va yechimlar” mavzusida ilmiy-amaliy anjumani to‘g‘risida
O‘zbekiston Respublikasi Prezidentining “Maʼmuriy islohotlar doirasida oliy taʼlim, fan va innovatsiyalar sohasida davlat boshqaruvini samarali tashkil qilish chora-tadbirlari to‘g‘risida” 2023 yil 4 iyuldagi PQ-200 qarori ijrosini taʼminlash maqsadida 2024 yil 18-19 aprel kunlari Toshkent davlat iqtisodiyot universiteti Samarqand filialida “Iqtisodiyotni barqaror rivojlantirishda raqamli texnologiyalar: muammolar, innovatsiya va yechimlar” mavzusidagi Respublika ilmiy-amaliy anjumani bo‘lib o‘tdi.
Anjuman ochilishi TDIU Samarqand filiali direktori, professor O.Murtazayevning kirish so‘zi bilan boshlandi. O.Murtazayev anjuman dasturida muhokama etilishi rejalashtirilgan muammolarning dolzarbligi va ularning amaliy ahamiyatini qayd etib, anjuman ishtirokchilariga muvaffaqiyatlar tiladi.
Anjuman dasturi bo‘yicha asosiy yalpi majlisda ishtirokchilar tomonidan quyidagi yo‘nalishlarda maʼruzalar tinglandi:
Ø Iqtisodiyotni raqamlashtirish sharoitida iqtisodiy jarayonlar va moliyaviy munosabatlarning transformatsiyasi;
Ø Raqamli iqtisodiyot sharoitida raqamli texnologiyalar va yechimlar;
Ø Biznes va tadbirkorlikning raqamli ko‘nikmalarini rivojlantirish;
Ø Raqamli iqtisodiyotni barqaror rivojlantirishda sunʼiy intellekt, robotlashtirish, IoT va smart texnologiyalar;
Ø Raqamli iqtisodiyotda axborot texnologiyalar, neyron tarmoqlar, modellashtirish va katta maʼlumotlar bazasi tahlili;
Ø Yashil iqtisodiyotni barqaror rivojlanishida innovatsion yondashuvlar;
Ø Raqamli iqtisodiyot sharoitida jamiyatni barqaror rivojlanishining huquqiy asoslari: hozirgi holat va rivojlanish istiqbollari.
Anjuman ochilishda xorijiy mutaxassislar, respublikamizda faoliyat yuritayotgan o‘nlab oliy taʼlim muassasalaridan va hamkor tashkilotlardan 60 dan ishtirokchilar qatnashdi. Bundan tashqari, ZOOM platformasi orqali onlayn maʼruzalar muhokama qilindi.
Anjuman 19 aprel kuni o‘z ishini davom ettirdi va dasturga kiritilgan maʼruzalar tinglandi va muhokama qilindi.
Anjuman ishida 100 ortiq maʼruzalar muhokama etildi. Anjuman yakunida so‘zga chiqqanlar ushbu tadbirning yuqori saviyada tashkil etilgani va xorijlik olimlarning ishtiroki uning nufuzini yana-da oshirganligini taʼkidladilar.
Ushbu anjumanda o‘z maʼruzalari bilan ishtirok etgan doktorantlar, mustaqil izlanuvchilar, magistrant va iqtidorli talaba-yoshlarimizning aksariyati ingliz tilida chiqish qilishlari Davlatimiz tomonidan yoshlarga bo‘lgan eʼtibor va yaratilayotgan imkoniyatlarning yorqin natijasi sifatida qayd etildi.
Anjuman ishtirokchilari muhokama qilgan mavzular bo‘yicha taklif va tavsiyalarni bildirishdi.
Anjuman yopilishida so‘zga chiqqan TDIU Samarqand filiali ilmiy ishlar va innovatsiyalar bo‘yicha direktor o‘rinbosari Z.X Abdullayev muhokama etilgan maqolalar bugungi kunda raqamli texnologiyalarning hayotimizning barcha sohalarida faol qo‘llanilishi va yechimini bag‘ishlanganligini yana bir bor taʼkidlab o‘tdi.
Tashkiliy qo‘mita anjuman ishida o‘z ilmiy natijalari bilan faol ishtirok etgan barcha ishtirokchilarga muvaffaqiyatlar tilab qoladi.
Anjuman tashkiliy qo‘mitasi