Toshkent davlat iqtisodiyot universiteti Samarqand filialida “Yoshlar orasida psixotrop moddalar tarqatilishining oldini olish” tadbiri o‘tkazildi 
Joriy yilning fevral oyi mamlakatimizda “Yoshlar orasida giyohvandlik vositalari va psixotrop moddalar tarqatilishining oldini olish” profilaktik oyligi deb eʼlon qilindi. Shu munosabat filialda joriy yilning 6-fevral kuni “Yoshlar orasida psixotrop moddalar tarqatilishining oldini olish” bo‘yicha tadbir o‘tkazildi.
Tadbirda filialga biriktirilgan profilaktika inspektori D.Shodmonov, Buxgalteriya hisobi va moliya fakulteti dekan o‘rinbosari L.Eshonqulov, ta’lim-tarbiya maslahatchisi N.Ashirbayeva va 3-kurs  BH-121, BH-221, BH-321 guruh talabalari ishtirok etishdi. 
Tadbirni tashkil etishdan asosiy maqsad, talabalarga psixotrop moddalarga qaramlikning salbiy oqibatlari, ma‘naviy va moddiy zararlari hamda qonunda belgilangan jinoiy javobgarliklar toʻgʻrisida maʼlumotlar berib oʻtishdan iborat edi. Profilaktika inspektori D.Shodmonov tomonidan psixotrop vositalar haqida ma‘lumotlar berilib, ularni  ta‘siriga tushib qolish omillari, jarayonlari hamda oqibatlari haqida batafsil tushuntirishlar berib oʻtildi. Shuningdek, psixotrop, narkotik va sarxush qiluvchi vositalar roʻyxatiga kiruvchi dorilar tanishtirilib, ularni tegishli ruxsatlarsiz yetishtirish, saqlash va tarqatganlik uchun belgilangan javobgarliklar tanishtirildi. Psixotrop moddalarga qaram boʻlgan insonni davolash bosqichlari hamda usullari haqida maʼlumot berildi. Tadbir davomida yigʻilganlarga bu illatning nafaqat inson jismoniy va ruhiy holatiga, balki, jamiyat hayotiga koʻrsatadigan salbiy taʼsiri ham ta‘kidlab oʻtildi.