Toshkent davlat iqtisodiyot universiteti Samarqand filialida “Islom – tinchlik va maʼrifat dini” hamda diniy asar va risolalar taqdimoti bo'lib o'tdi.
ISLOM – TINCHLIK VA MA’RIFAT DINI
Bugun yurtimizda buzg‘unchi yot mafkuralarga qarshi kurash chora-tadbirlari “Jaholatga qarshi ma’rifat” ulug‘vor g‘oyasi asosida olib borilmoqda. Davlatimiz rahbarining “Diniy-ma’rifiy soha faoliyatini tubdan takomillashtirish chora-tadbirlari to‘g‘risida”gi Farmonida ta’kidlanganidek, “Jaholatga qarshi ma’rifat” g‘oyasi asosida dinni zo‘ravonlik va qon to‘kish bilan bir qatorga qo‘yadigan buzg‘unchi yot g‘oyalarning asl mohiyati va maqsadlari haqida aholining, ayniqsa yoshlarning xabardorlik darajasini oshirish, jamiyatda milliy va diniy qadriyatlarimizga yot bo‘lgan g‘oyalarga nisbatan toqatsizlik muhitini shakllantirish kabi vazifalarni amalga oshirish nazarda tutilmoqda.
Joriy yil 22-fevral kuni Toshkent davlat iqtisodiyot universiteti Samarqand filiali va Imom Buxoriy xalqaro ilmiy tadqiqot markazi vakillari bilan hamkorlikda professor-o‘qituvchilar hamda talaba-yoshlar uchun “Islom – tinchlik va ma’rifat dini” mavzusida tadbir tashkil etildi. Unda Yoshlar masalalari va ma’naviy-ma’rifiy ishlar bo‘yicha direktorning birinchi o‘rinbosari X.Turdibekov, Imom Buxoriy xalqaro ilmiy-tadqiqot markazi direktori o‘rinbosari – (PhD), O.Muhammadiev, Imom Buxoriy xaqaro ilmiy tadqiqot markazi bo‘lim boshlig‘i – T.Evadullaev, Ijtimoiy-ma’naviy muhit barqarorligini ta’minlash bo‘yicha direktor maslahatchisi G‘.Qurbonov, Yoshlar bilan ishlash, ma’naviyat va ma’rifat bo‘limi boshlig‘i Y.Isomiddinov qatnashdilar va tegishli mavzularda ma’ruzalar qildilar.
Ma’ruzalarda O‘zbekistonda davlatning din va diniy tashkilotlar bilan o‘zaro munosabati, islom dinining tinchlikparvarlik mohiyati hamda islom dinida mutaassiblik va jaholatning qoralanishi, “jaholatga qarshi ma’rifat” bilan kurashish g‘oyasining ahamiyati kabi bugungi kunning bir qator dolzarb masalalariga alohida e’tibor qaratildi.
Shuningdek, tadbirda millatlararo totuvlik va diniy bag‘rikenglikning mohiyati, mutaassiblik, ekstremizm hamda terrorizmning salbiy jihatlari, islom niqobi ostida faoliyat ko‘rsatayotgan buzg‘unchi oqim va harakatlarning yuzaga kelish tarixi, ularning maqsadi, g‘oyaviy-aqidaviy asoslari, moliyaviy manbalari, faoliyat uslublari va g‘ayriislomiy mohiyati keng qamrovli ma’lumotlar va dalillar asosida ochib berildi.