Toshkent davlat iqtisodiyot universiteti Samarqand filialida “Jaholatga qarshi ma’rifat asosida yoshlarni aqidaparastlik oqimlaridan saqlash” mavzusida ma’rifiy tadbir bo'lib o'tdi.
Joriy yil 7-noyabr kunida bo'lib o'tgan ushbu tadbirda, yoshlar masalalari va maʼnaviy-maʼrifiy ishlar boʻyicha direktorning birinchi o‘rinbosari -  X.I.Turdibekov, talabalar orasida ijtimoiy-ma’naviy muhit barqarorligini ta’minlash bo'yicha direktor maslahatchisi - Kurbanov Gayrat Mamatkulovich, Boymurodov Sohibnazar – Samarqand viloyat hokimligining “Diniy ishlar qo’mita rahbari”, B.Baxodirov– Filial yoshlar yetakchisi, professor-o'qituvchilar, tyutorlar hamda talabalar ishtirok etishdi.
Tadbirni  TDIU SF direktor o’rinbosari X.I.Turdibekov – kirish so‘zi bilan ochdi. O‘zbekiston kelajagi buyuk davlat hisoblanib, malum bir rivojlanish bosqichlarini boshidan otkazgan. Mana shu vaqt davomida bu yurtga yaxshi g’oyalar bilan birga salbiy g’oyalar ham kirib keldi. Bunday salbiy va buzg’unchi g’oyalarga diniy ekstrimizm, terrorizm kabilar kiradi. Har qanday ekstremistik va terroristik faoliyatning mohiyati o‘zgalar ustidan hukmronlikka yoxud mavjud siyosiy-mafkuraviy, ijtimoiy-iqtisodiy tartibotga qarshi zo‘ravonlik, daxshat solish, jismoniy kuch ishlatish orqali o‘zgalarning g‘arazli maqsadlariga erishishdan iboratdir. Diniy ekstremizm va xalqaro terrorizmning Markaziy Osiyo mintaqasi xavfsizligiga solayotgan zamonaviy tahdidi, terrorizmga qarshi kurashishda fuqarolarning ma’naviy va huquqiy madaniyatini oshirishni talab qilmoqda. Terrorizm tom ma’noda jaholatdir. Buzg‘unchi g‘oyalarga asoslangan xalqaro terrorizm va uning har qanday ko‘rinishi kishilik jamiyatining o‘tmishida ham, bugunida ham butun xalqlar boshiga og‘ir kulfatlar yog‘dirmoqda. Har yili uning tajovuzidan mingdan ortiq begunoh kishilar qurbon bo‘lmoqda, jamiyat rivojlanishi ayrim davlatlar, mintaqalar va insoniyat sivilizatsiyasining taraqqiyotiga jiddiy tahdid solmoqda va tarqalishi ham ekstremizm va terrorizmning jahon miqyosida keng ko‘lamda avj olishiga sabab bo’layotgani aytib o‘tdi va so‘z navbatini Samarqand viloyat hokimligi “Diniy ishlar boshqarmasi boshlig’iga” berdi.
 

S.Boymurodov o‘z ma’ruzasini “Ekstremizmni salbiy oqibatlari”  mavzusidagi video rolikni namoyish etgandan keyin boshladi – Ekstremizm va terrorizm insoniyat bilan birga XXI asrga kirib kelgan eng xavfli ijtimoiy illatlardan biriga aylandi. Ekstremizm bag’rikenglik, rang-baranglik va hamfikrlilikni rad etishi bilan mamlakat taraqqiyoti va fuqarolararo hamjihatlikka raxna solayotganligi. Aqidaparastlar nafaqat ijtimoiy hayotning siyosiy, iqtisodiy yoki madaniy sohalariga zarar etkazadilar, balki jamiyatga ommaviy tarzda psixologik bosim o’tkazib, eng mudhish shakllardagi zo’ravonlik va agressivlik mafkurasini yoyadilar. Shu nuqtai-nazardan, jamiyatda diniy asosda nizolar chiqishiga yo'l qo'ymaslik, dinni siyosiylashtirish va soxtalashtirish orqali mamlakatdagi ijtimoiy barqarorlikni izdan chiqarishga qaratilgan har qanday harakatning oldini olish davlat va jamiyatning oldida turgan hayotiy muhim masalalardan biri hisoblanadi. Bugungi kunda ekstremizm va terrorizm alohida mamlakatlarning milliy xavfsizligi va umuman jahon hamjamiyatiga jiddiy tahdid uyg'otayotgan omilga aylandi. Umumbashariy muammoga aylangan ekstremizm va terrorizmni jahon hamjamiyati faqat birgalikda, turli tor geosiyosiy manfaatlardan voz kechgan holda harakat qilibgina enga olishi mumkinligi aksariyat davlatlar tomonidan tan olingan ayni haqiqatdir.

Prezidentimiz Sh.M.Mirziyoev ham bu masala yuzasidan: “Ayni vaqtda dunyoning ba’zi mintaqalarida yuzaga kelgan notinch vaziyat aholi migratsiyasi kuchayishiga, bu esa, o’z navbatida, terrorizm va ekstremizmning tarqalishiga hamda ularning global muammolardan biriga aylanishiga olib kelmoqda. Bunday vaziyatda milliy davlatchiligimiz, mustaqilligimiz, aholimizning tinch va osoyishta hayoti va xavfsizligimizni saqlash biz uchun eng ustuvor vazifaga aylanib bormoqda” deb so’zlaganlar.

Ta’kidlash joizki, turli ekstremistik va terroristik tashkilotlar Markaziy Osiyo davlatlaridagi ijtimoiy-siyosiy vaziyatni izdan chiqarishga qaratilgan faoliyatini davom ettirmoqda. Shu nuqtai-nazardan, muhtaram Prezidentimiz Sh.M.Mirziyoev jahon hamjamiyati e'tiborini Markaziy Osiyoda xavfsizlik va barqarorlikni ta'minlash maqsadida amaliy hamkorlikni yanada mustahkamlash, terrorizm va ekstremizm, transmilliy jinoyatchilik va narkotrafik tahdidlariga qarshi samarali kurashishni BMT preventiv diplomatiya usullaridan foydalangan holda, shuningdek, MDH, ShHT, EXHT va boshqa nufuzli xalqaro hamda mintaqaviy tuzilmalar mexanizmlari doirasida ta’minlash mumkin ekaniga, xavfsizlikka tahdidlarni “o’ziniki va o’zgalarniki” deb ajratishdan voz kechish, “yaxlit xavfsizlik” tamoyiliga amalda rioya qilish zarurligiga qaratmoqda. Ekstremizm va terrorizm illatining so’nggi paytlarda tobora kuchayib borayotgani mazkur muammoning naqadar dolzarb ekanini ko’rsatayotgani to’g’risida ma’lumot berdi.

Diniy eksremizmning salbiy oqibatlari, Suriya va Iroq davlatlaridagi urush harakatlariga aldanib jalb etilgan vatandoshlarimizning ayanchli qismatiga bag‘ishlangan videorolik namoyish etildi.
G’.Kurbonov – tadbir so’ngida - zamonaviy dunyoda ekstremizmga qarshi kurash va ogohlik eng birinchi o’rinda e’tibor qaratilishi kerak bo’lgan jihatlardan biri hisoblanadi. Yoshlarimiz bugungi kunda g’araz niyatli kishilar qo’liga tushsa juda kuchli qurolga aylanishi mumkin. Ijtimoiy tarmoqlar va internet orqali ekstremistik ma’lumotlarni yoshlar o’rtasida tarqalishiga bog’liq jinoyatlar ko’p yoritilmoqda. Tafsilotlarga e’tibor bersangiz, bir qarashda ahamiyatsiz deb bilingan kichik ma’lumotlar kishilarga ma’naviy, ruhiy zarar yetkazayapti. Ko’ngilsizliklarning oldini olish uchun har bir kishi o’zi uchun shaxsiy va oilaviy jamoaviy xavfsizligi haqida umumiy ma’lumotga ega bo’lishi kerak. Internet texnologiyalarining hozirgi rivojlanish davrida esa bizlarning va yoshlarimizning xavfsizligi nafaqat kattalar, balki bolalarga ham mukammal o’rgatilishi kerak bo’lgan soha bo’lib qolmoqda.
Yakunda tadbir ishtirokchilari o'zlarini qiziqtirgan savollarga atroflicha javob oldilar.