“Yoshlar kelajak tayanchi”
Mamlakatimiz taraqqiyoti har tomonlama oʻsib-oʻqib kelayotgan navqiron avlodning taʼlim tarbiyasi, maʼnaviyati va madaniyati bilan chambarchas bogʻliq. Yurtimizda yoshlarga qaratilayotgan eʼtibor, gʻamxoʻrlik mamlakatimizda olib borilayotgan siyosatning eng ustuvor yoʻnalishidir. Har bir sohada qoʻlga kiritilayotgan marralar, yutuqlar ana shu gʻamxoʻrlik va qoʻllab-quvvatlashning yorqin ifodasidir. Vatan taqdiriga daxldor ekanligini his qilib yashash va berilayotgan imkoniyatlardan unumli foydalanish har bir Oʻzbekiston farzandining muqaddas burchidir.

Aynan shu sababdan, Toshkent davlat iqtisodiyot universiteti Samarqand filiali hamda martaba.uz huquqiy, madaniy, maʼnaviy-maʼrifiy veb-sayti tahririyati tomonidan talaba yoshlarning huquqiy-maʼnaviy jihatdan kamol toptirish maqsadida joriy yilning 20-may kuni katta faollar zalida “Yoshlar kelajak tayanchi” mavzusida tadbir oʻtkazildi. Tadbirda filiali direktori O.Murtazayev soʻzga chiqib zamonaviy bilim va koʻnikmalarga ega, mamlakatning munosib kelajagi uchun javobgarlikni oʻz zimmasiga ola biladigan barkamol, maqsadga intiluvchan va sergʻayrat yoshlarni tarbiyalash mamlakatni barqaror va ildam rivojlantirishning eng muhim sharti ekanligi boʻyicha toʻxtalib oʻtdi. Tadbir yakunida Mamlakatimizda yoshlarning huquq va manfaatlarini himoya qilish, ularga zarur shart-sharoitlar va imkoniyatlarni yaratib berish borasida ulkan hissa qoʻshib kelayotgan bir guruh professor-oʻqituvchilar va  talaba-yoshlar  Toshkent davlat iqtisodiyot universiteti Samarqand filiali hamda martaba.uz huquqiy, madaniy, maʼnaviy-maʼrifiy veb-sayti tahririyati tomonidan diplom va esdalik sovgʻalari bilan taqdirlandilar.