1- fevral 2022- yil Toshkent davlat iqtisodiyot universiteti Samarqand filial direktori, professor O.Murtazaev direktor raisligida direktor oʻrinbosarlari, boʻlim boshliqlari, fakultet dekani va dekan oʻrinbosarlari ishtirokida yigʻilish oʻtkazildi. Yigʻilish kun tartibidagi birinchi masala oliy taʼlim muassasalarida talabalarining oʻqishdan boʻsh vaqtlarida bandligini taʼminlashga qaratildi.

   Talablarning oʻqishdan boʻsh vaqtini mazmunli oʻtkazish, ularning boʻsh vaqtlaridagi bandligini taʼminlashga OOʻMTV miqyosida eʼtibor qaratilayotganligi taʼkidlab oʻtildi. Talaba darsdan boʻsh vaqtlarida sport toʻgaraklari, oʻquv kurslariga jalb etish va bandligini taʼminlash boʻyicha takliflar ishlab chiqish topshirigʻi berildi. Kun tartibidagi ikkinchi masala 2022 yil 28 yanvar kuni Prezident Sh.Mirziyoev rahbarligida oʻtkazilgan yigʻilishda berilgan topshiriqlar ijrosini taʼminlash maqsadida oliy taʼlim muassasalari 23 ta mezon asosida tanqidiy va tahliliy oʻrganilishiga bagʻishlandi.

   Asosiy eʼtibor oliy taʼlimdagi islohotlar, ilm, fan va ishlab chiqarishdagi integratsiyalar, axborot-resurs markazlari faoliyati, moliyaviy, akademik mustaqillik berilgan taʼlim muassasalariga amaliy koʻmak berish, ilmiy salohiyat, taʼlim jarayonining qay darajada tashkil etilgani, masofaviy taʼlim, kredit-modul tizimi, talabalar turar joylarida yaratilgan shart-sharoitlar, korrupsiyaga qarshi kurashish va shaffoflikni taʼminlashning taʼsirchan mexanizmlari joriy etilganligi kabi mezonlarga qaratilishi aytib oʻtildi.

   Oʻrganishdan maqsad oliy taʼlim muassasalarining taʼlim jarayonini toʻgʻri yoʻlga qoʻyish, taʼlim sifatini oshirish, ilmiy va innovatsion faoliyatni samarali tashkil etish hamda raqobatbardoshligini oshirish, raqamli texnologiyalarni toʻliq joriy etish orqali taʼlim jarayonini sifat jihatidan yangi bosqichga koʻtarish ekanligi taʼkidlab oʻtildi. Barcha oʻrganishlar televideniye, ijtimoiy tarmoqlar orqali muntazam yoritib borilishi aytib oʻtildi.