Toshkent davlat iqtisodiyot universiteti Samarqand filialida xalqaro uchrashuv bo'lib o'tdi.Bugun TDIU Samarqand filialida Chexiyaning O’zbekistondagi favqulodda va muxtor elchisi Lyubomir Frebort va Praga Kimyo va Texnologiyalar universiteti hamda Chexiya hayot fanlari universiteti rasmiy vakillari bilan uchrashuv bo’lib o’tdi. Rasmiy uchrashuvda filial direktori, professor O.Murtazayev, direktor o’rinbosarlari, fakultet dekanlari, bo’lim boshliqlari va kafedra mudirlari hamda Praga Kimyo va Texnologiyalar universiteti Xalqaro hamkorlik menejeri Kretsi Milosh va Chexiya hayotiy fanlar universiteti Iqtisodiyot va biznes fakulteti dekan o’rinbosari Silvia Kotaskovalar qatnashdilar.
Uchrashuvda filial va Chexiyadagi mazkur ikki universitet bilan xalqaro hamkorlikni mustahkamlash va turli xil ta’lim dasturlarini amalga oshirishdan ikki tomon ham birdek manfaatdorligi qayd etib o’tildi.
Joriy yilning 05-mart kuni Praga Kimyo va Texnologiyalar universiteti (Yevropa ittifoqining nufuzli xalqaro QS reytingda # 375-o’rinda) hamda Skoda Avto Universitetlari bilan “Iqtisodiyot va menejment” yo'nalishida qo'shma ta'lim dasturlarini tashkil etish haqida kelishib olingan edi. O’tgan davr mobaynida qo'shma ta'lim dasturlarini tashkil etish shartnomasini tuzish va shakllantirish ustida ishlar olib borildi. Shunga asosan, bugungi uchrashuvda filial va Praga Kimyo va Texnologiyalar universitetlari o’rtasida qo'shma ta'lim dasturlarini tashkil etish bo’yicha rasman shartnoma imzolash marosimi ham o’tkazildi. Shu bilan filialda bakalavr bosqichida qo'shma ta'lim dasturlari soni 6 taga yetdi. Qo'shma ta'lim dasturlari bo’yicha TDIU Samarqand filiali hamkorlik qilayotgan Germaniya, Malayziya, Latviya davlatlari qatoriga Chexiya Respublikasi ham qo’shildi. Kelasi o’quv yilidan boshlab Praga Kimyo va Texnologiyalar universiteti bilan ham qo’shma ta’lim dasturiga talabalar qabul qilinishi rejalashtirilgan.