Toshkent davlat iqtisodiyot universiteti Samarqand filialida ta’lim jarayonida amalga oshirilayotgan ishlar samaradorligini aniqlash va kelgusidagi vazifalarni belgilab olish uchun talabalarning xolis fikrlarini o’rganish maqsadida talabalar o’rtasida anonim so’rovnomalar o’tkazilmoqda.

1. Hozirgi kunda universitet filialimizda ta’lim sifati, darajasi qanday?;

2. Qaysi professor-o’qituvchilar darsidan qoniqayapsiz?;

3. Oliygoh kutubxonalari faoliyatidan qoniqyapsizmi?

Talabalardan savollarga aniq va xolis, shaxsiy fikrlarini bildirish talab qilinmoqda. Albatta, bu kabi so’rovnomalar ta’lim sifatini yaxshilashda va adolatli, korrupsiyasiz ta’limni yo’lga qo’yishda alohida ahamiyatga ega. Professor-o’qituvchilarning dars jarayonini qay darajada tashkil eta olishi, ularning bergan bilimlari talabalarni qoniqtira olish-olmasligi ham tekshirildi. O’quv jarayonidan noroziliklar, sharoitlarning yetishmasligi ilm olishga ishtiyoqmand talabalar ruhiga salbiy ta’sir ko’rsatishi tayin. Ayniqsa, korrupsiyali holat ularning nafaqat ta’lim tizimidan, butun jamiyatdan ko’ngli qolishiga sabab bo’ladi. Fikr erkinligi, so’z erkinligi targ’ib qilinayotgan bir davrda ham talabalar o’z fikrlarini erkin bildirishga, ochiq norozilik ko’rsatishga qo’rqadilar. Bugungi kunda yoshlarimizning har sohada o’z so’zini ayta oladigan, har tomonlama yetuk va barkamol inson bo’lib voyaga yetishi uchun barcha sharoitlar yaratilmoqda. Biz – talabalar universitet filiali rahbariyatidan yana ko’plab shunday so’rovnomalar o’tkazilishini va fikrlarimiz inobatga olinishini so’rab qolardik. Bu so’rovnomalar talabalarning ilm olishga bo’lgan ishonchini yana bir karra orttiradi.

Toshkent davlat iqtisodiyot universiteti Samarqand filiali Iqtisodiyot fakulteti talabasi A.Xurramov

Toshkent davlat iqtisodiyot universiteti Samarqand filiali Matbot xizmati