O’zbekiston Respublikasi Prezidenti Sh.Mirziyoyev tashabbusi bilan Toshkent shahrida Abdulla Qodiriy nomidagi ijod maktabi hamda Muhammad Al-Xorazmiy nomidagi axborot-kommunikatsiya texnologiyalari yo’nalishini chuqur o’rganish bo’yicha ixtisoslashtirilgan umumta’lim maktablari tashkil etildi. 

Mazkur maktablarning ochilish marosimida muhtaram Prezidentimizning shaxsan o’zlari ishtirok etdi va yosh avlodga uzluksiz ta’lim-tarbiya berib kelayotgan rahbar xodimlarning yangi tashkil etilgan maktablarga tashrifi amalga oshirilib, ularda yaratilgan sharoitlarni o’zlari boshqarib kelayotgan ta’lim muassasalariga joriy etishlari yuzasidan alohida ko’rsatmalar berib o’tdilar.

Yuqoridagilarni inobatga olib, rahbariyat tomonidan har bir oliy ta’lim muassasasi rahbarlari hamda kasbiy ta’limni rivojlantirish va muvofiqlashtirish hududiy boshqarmalar boshliqlarining ushbu maktablarga tashrifini uyushtirish vazifasi topshirildi. Shu munosabat bilan 2020-yilning 4-yanvar kuni Toshkent shahrida yangi tashkil etilgan har ikkita maktablarga bir qancha oliy ta’lim muassaslari rektorlari tashrif buyurishdi. Delegatsiya bu yerda o’quvchi iqtidorini namoyon qilish uchun yaratilgan butun bir majmua: zamonaviy jihozlangan o’quv xonalari, ilg’or pedtexnologiya va innovatsion metodlardan foydalangan holda darslarning olib borilishi, darsdan tashqari paytda bola iqtidorini rivojlantirish uchun yo’lga qo’yilgan tizim, o’quvchilar turar joylarida keng imkoniyatlar yaratilganligiga guvoh bo’lishdi.

Tashrif davomida Inomjon Majidov maktabda o’quvchi vaqtini to’g’ri taqsimlash va dars jarayonlarini samarali olib borish, qolaversa, o’quvchining iqtidorini rag’batlantirish maqsadida ular bilan individual ishlashni yo’lga qo’yishda oliy ta’lim muassasalari professor-o’qituvchilari bilan yaqindan hamkorlik qilishni taklif qildi.

Toshkent davlat iqtisodiyot universiteti Samarqand filiali Matbuot xizmati