Filialda “Konstitutsiya meniki, seniki, bizniki! Konstitutsiya oʻzimizniki” tadbiri bo'lib o'tdi.

Katta oʻzgarish va yangilanishlar ostonasida turibmiz. Huquq va majburiyatlarimizni kafolatlaydigan Bosh qomusimizning xalqimiz hayotida, turish-turmushida ahamiyati benihoya katta. Bugungi shiddat ila oʻzgarayotgan davr, zamon rivojlanishni talab etadi. Albatta, oʻzgarishlarni barcha sohalarda, tizimlarda koʻrish mumkin. Shu bilan birga konstitutsiyamizning har bir moddasida, bobida, umuman mazmunan boyitishda xalq xohish-irodasi, istaklari inobatga olinib, koʻpning manfaatlari uchun xizmat qilmogʻi uchun xalq fikri tinglandi, konstitutsiyaviy qonun loyihasi ishlab chiqildi.

Respublikamiz boʻylab “Konstitutsiya meniki, seniki, bizniki! Konstitutsiya oʻzimizniki” shiori ostida konstitutsiyaviy qonun loyihasi boʻyicha targʻibot tadbirlari tashkil etilib, keng omma hukmiga havola etilayotir. Unda soʻzga chiqqanlar esa siz-u bizdek oramizdagi oddiy odamlar, mehnatkash xalq vakillari. Shuni ham aytish kerakki, ularning-da oʻz haqiqatlari, oʻz davrida chekkan azoblari bor. Nohaqlik qurboniga aylangan bu insonlarning taqdiri endi takrorlanmaydi. Sababi yangi qonun loyihasi kuchga kirishi bilan xalq manfaatlari uchun ishlaydi. Ana shunday targʻibot-tashviqot tadbiri Toshkent davlat iqtisodiyot universiteti Samarqand filialida ham tashkil etildi.

Tadbirda yoshlar masalalari va maʼnaviy-maʼrifiy ishlar boʻyicha direktor oʻrinbosari X.Turdibekov, Yoshlar bilan ishlash, maʼnaviyat va maʼrifat boʻlimi boshligʻi Y.Isomiddinov, Samarqand davlat tibbiyot universiteti pediatriya fakulteti 3-son pediatriya va tibbiy genetika kafedrasi dotsenti t.f.d. O.Sharipova va talabalar soʻzga chiqib, konstitutsiyamizning mazmun-mohiyati va referendumning ahamiyati haqida soʻz yuritishdi.

Maʼruzachilar oʻz maʼruzalaridan soʻng 30-aprel kuni Konstitutsiya qonun loyihasi boʻyicha oʻtkaziladigan Referendumda faol qatnashishini va oʻzining kelajagiga befarq boʻlmagan barchani faol boʻlishga chaqirdi.