O‘zbekiston Respublikasining Birinchi Prezidenti Islom Abdug‘anievich Karimov tavalludining 85 yilligi munosabati bilan 2023 yil 30 yanvar kuni Toshkent davlat iqtisodiyot universiteti Samarqand filiali Axborot resurs markazida  «Islom Karimov – mustaqil O‘zbekiston asoschisi» mavzusida davra suhbati bo‘lib o‘tdi.
Tadbirda professor-o‘qituvchilar, tyutorlar va talaba-yoshlar ishtirok etdi.
Tadbirda so‘zga chiqqan yoshlar masalalari va  ma’naviy-ma’rifiy ishlar bo‘yicha direktor o‘rinbosari X.I.Turdibekov, “Tabiiy, ijtimoiy fanlar va jismoniy madaniyat” kafedrasi mudiri O‘.J.Xudoyorovlar Islom Karimovning serqirra faoliyati, oliyjanob insoniy fazilatlari bilan Vatanimiz tarixida o‘chmas iz qoldirgani, nafaqat O‘zbekiston, balki jahon miqyosida katta hurmat va obro‘-e’tiborga sazovor bo‘lgan ulkan shaxs, davlat va siyosat arbobi sifatida tanilganini ta’kidlashdi. Darhaqiqat, Birinchi Prezidentimiz o‘zining Prezident sifatidagi butun hayoti va faoliyatini yurtimizda yangi davlat, yangi jamiyat barpo etish, mustaqilligimizni mustahkamlash, o‘zbek nomini, O‘zbekiston nomini butun dunyoga tarannum etishdek ulug‘ maqsadga bag‘ishladi. Xalqimiz mamlakatimizda istiqlol yillarida amalga oshirilgan ulkan o‘zgarishlarni haqli ravishda Birinchi Prezidentimiz nomi bilan bog‘laydi.
Shu bilan birga, davra suhbatida xalqimizning tinch va farovon hayoti, mamlakatimizning barqaror iqtisodiy ravnaqi uchun borlig‘ini, umrini bag‘ishlagan, jahon miqyosida katta obro‘-e’tibor qozongan buyuk davlat va siyosat arbobi Islom Karimovning beqiyos xizmatlarini yoshlar ongu qalbiga singdirish katta tarbiyaviy ahamiyatga ega.
Tadbir so‘nggida Islom Abdug‘anievich Karimov hayoti va faoliyatiga bag‘ishlangan hujjatli film namoyish etildi.