Toshkent davlat iqtisodiyot universiteti Samarqand filialida “1-dekabr – Xalqaro OITSga qarshi kurash” kuniga bag'ishlangan ma'naviy-ma'rifiy tadbir tashkil etildi.
Joriy yil 1-dekabr kuni filialda xalqaro OITS kasalligiga qarshi kurash kuniga bag'ishlangan tadbir tashkil etildi. Ushbu tadbirda filiamiz mas'ul xodimlari, talaba yoshlaridan tashqari Qo'ldosheva Sanobar Suyunovna - Samarqand viloyati oitsga qarshi kurashish markazining oliy toifali shifokori, Mamatqulova Gulshoda Qaxramonovna - Samarqand viloyati oitsga qarshi kurashish markazining hamshirasi, Viloyat narkologiya desponseri - Bo'riyev Monichexr Matlubovich ham qatnashishdi.
Darhaqiqat, OIV infeksiyasi hozirgi kunning global muammolaridan biri sanaladi. Kasallik epidemiyasi boshlangandan buyon dunyoda 75 milliondan ortiq odam ushbu infeksiya bilan xastalangan. SHudan ham ko'rinib turibdiki, OIV va OITSga qarshi butun dunyo hamjihatlikda kurashishi lozim. 

Infeksiya 75 foizdan ortiq holatlarda 25-49 yoshli kishilar o'rtasida uchramoqda. Kasallik profilaktikasi va unga qarshi kurashish tadbirlarini rejalashtirish hamda amalga oshirishda uning yuqish omillarini aniqlash muhim hisoblanadi.So'nggi yillarda butun dunyoda OITSning jinsiy yo'l bilan yuqish darajasi ortib bormoqda. Bu holat mamlakatimizda ham kuzatilib, 2021 yilning 10 oyi davomida ro'yxatga olingan bemorlarning 74 foizdan ortig'iga xastalik shu yo'l bilan yuqqani gumon qilingan.Mamlakatimizda OITSga qarshi kurash tizimi tomonidan oxirgi yillarda barcha yo'nalishlarida sezilarli natijalarga erishilmoqda. 2019-2020 yillarda Respublikamizning 2 ta yirik shahri — Toshkent va Samarqand OIV infeksiyasi tarqalishiga qarshi kurashish va aholi sog'lig'ini yaxshilash to'g'risidagi “Parij deklarasiyasi” deb nomlanadigan butunjahon tashbbusiga qo'shildi.OIV aniqlangan shaxslarni davolashning dunyoda tan olingan usuli — retrovirusga qarshi davolash usuli bo'lib, yurtimizda bemorlarning 75 foizdan ortig'i ushbu davolash usuli bilan qamrab olingan. JSSTning “OIV aniqlanishi bilan davolashni boshlash zarur” degan tavsiyalari asosida bugungi kunda me'yoriy hujjatlarga o'zgartirishlar kiritilmoqda.

Joriy yilda vatanimizga qaytgan 158 ming 448 nafar mehnat muhojirlarining 80 foizga yaqini OIVga tekshiruvlar bilan qamrab olindi va infeksiya aniqlangan holatlarda dispanser nazoratiga olindi.Mamlakatimizda JSST tavsiyalariga muvofiq, OIV infeksiyasi onadan bolaga yuqishining oldini olish dasturi joriy etilgan. Unga ko'ra, har yili o'rtacha 600 ming homilador ayollar OIVga tekshiriladi. Infeksiyali ayollardan tug'ilgan chaqaloqlarga  xastalik yuqishining oldini olish maqsadida retrovirusga qarshi dorilar o'z vaqtida berib boriladi.Onasi chet davlatlarda bo'lib, faqat tug'ish vaqtida O'zbekistonga kelgan yoki shifokorlarning tavsiyasiga amal qilmagan hollarda chaqaloqlarning kasallikni yuqtirib olishini kuzatish mumkin. Infeksiya onadan bolaga o'tishining oldini olish maqsadida retrovirusga qarshi joriy etilgan profilaktika samaradorligi 95 foizdan ziyod darajani ko'rsatmoqda.OIV infeksiyasini respublikamizda tarqalishining oldini olish maqsadida YUNISEF, YUNFPA kabi halqaro tashkilotlar bilan bir qator loyihalar amalga oshirilmoqda.Koronavirus pandemiyasi barchamizga yana bir bor sog'liqni saqlash sohasi inson huquqlari, gender tengligi, ijtimoiy himoya va iqtisodiy o'sish kabi boshqa muhim masalalar bilan chambarchas bog'liqligini ko'rsatdi.Shuning uchun, bu yil butunjahon OITSga qarshi kurash kuni shiori “Tengsizlikka barham berish. OITSni tugatish. Pandemiyani to'xtatish” deb belgilandi.
Tadbir davomida, mutaxassislar tomonidan ushbu kasalliklarning yomon oqibatlarga olib kelishi, ushbu kasalliklarni o'z vaqtida oldini olish, yetarli ma'lumotga ega bo'lishmagan taqdirda viloyat markazlariga murojaat etish va u yerda anonim tarzda test tahlili o'tkazilishi mumkinligi haqida yig'ilganlarga ma'lumot berildi. Shuningdek ishtiroklar o'zlarini qiziqtirgan savollarga javoblar ham olishdi.