Bugun filialning 101 o‘quv xonasida Toshkent davlat iqtisodiyot universiteti Samarqand filiali direktori o‘rinbosari Farxod Axrorov tomonidan talabalar uchun “Xorijda ta’lim olish yo‘llari” mavzusida seminar-trening bo‘lib o‘tdi.

–  Xorijda o‘qimoqchi bo‘lganlarga eng katta tavsiyam, agentlikmi yoki elchixona orqali ketasizmi, grant yoki o‘z hisobingizdanmi, ahamiyati yo‘q, - deydi F.Axrorov. – Avvalo, borayotgan joyingizni yaxshilab surishtirib, imkoniyatlari bilan tanishib, yotoqxonasi, odamlari, qonun-qoidalari, xullas, hamma-hammasi haqida to‘liq biling. Bo‘lmasa boshqa madaniyatlar ichida dovdirab qolishi yoki borgandan keyin afsuslanishlari turgan gap! Eng asosiy talab til ekanini unutmang – birorta xorijiy til, masalan ingliz yoki rus tilini bilmasangiz va yaqin 3-4 oy ichida o‘rganib olishga kuchli ishtiyoqingiz bo‘lmasa, shu yilda xorijda tahsil olish fikridan voz keching va kerakli tilni o‘rganing.

Har qanday xorijiy oliy o‘quv yurtlari til bilish ko‘nikmasini so‘raydi. Bunga talaba tayyor bo‘lishi kerak. Til bilish ko‘nikmasi odatda IELTS, TOEFL kabi xalqaro tan olingan testing tizimlari taqdim etadigan sertifikatlar orqali baholanadi. Ammo OTM o‘zi ham maxsus testlarni taklif etishi, 1 yil til kursida o‘qishini taklif etishi mumkin.

Ko‘pchilik shu taklif bo‘yicha ketib, keyin talaba bo‘laman deb o‘ylaydi. Bu xato. Aslida 1 yildan keyin, masalan, Xitoy tilidan kerakli darajaga chiqa olmasangiz, siz faqat Xitoyda yashab, til o‘rganishga harakat qilib, kerakli ballni to‘play olmagan bo‘lasiz.

Shuningdek, Toshkent davlat iqtisodiyot universiteti Samarqand filiali direktori o‘rinbosari F. Axrorov Yangi O‘zbekistonda olib borilayotgan keng islohatlar, ayniqsa Prezidentimiz tomonidan yoshlarga berilayotgan e’tibor to‘g‘risida ham gapirib o‘tdi.

Seminar davomida talabalar o‘zlarining qiziqtirgan savollariga batafsil javoblar olishdi.

Matbuot xizmati