TDIU Samarqand filialiga 2024-yil 21 sentyabr kuni xalqaro qo’shma ta’lim dasturi bo’yicha hamkor oliy ta’lim muassasasi bo’lgan Germaniyaning Vaynshtefan-Triyezdorf universiteti prezidenti Dr Erik Veollit , vitse-prezidenti Dr Karsten Lorz va xalqaro dasturlar bo’yicha menejeri Dr Aram Aristakesyanlar tashrif buyurdi. 
Ushrashuvda filial direktori prof. Olim Murtazayev mehmonlarga ushbu tashrif filialning xalqaro hamkorligini yanada mustahkamlash, kelgusida qo‘shma ta’lim dasturlarini rivojlantirishda muhim qadam ekanligini ta’kidladi. Shuningdek TDIU Samarqand filiali va Vaynshtefan-Triyezdorf universiteti o‘rtasidagi aloqalar 2019-yilda hamkorlik memorandumi imzolangandan beri izchil rivojlanib kelayotganligini, hamda ushbu davr mobaynida filial talabalariga o‘qish va tajriba orttirish imkoniyatlarini yaratish bo‘yicha erishilgan ulkan yutuqlar uchun mehmonlarga o’z minnatdorchiligini bildirdi.
O’z navbatida Vaynshtefan-Triyezdorf universiteti prezidenti Dr Erik Veollit ham universitet va filial o’rtasida xalqaro qo’shma ta’lim dasturi bo’yicha hamkorlik ikki davlat o’rtasidagi aloqalarni mustahkamlashda, malakali kadrlarni tayyorlash, ushbu qo’shma ta’lim dasturi bitiruvchilari har ikkala davlat iqtisodiyotiga ulkan hissa qo’shayotganligidan mamnun ekanligini bildirdi.
Vaynshtefan-Triyezdorf universiteti xalqaro dasturlar bo’yicha menejeri Dr Aram Aristakesyan universitet haqida uchrashuv qatnashchilariga taqdimot qildi. Taqdimotda universitet amaliy fanlarga ixtisoslashganligi, bu esa bitiruvchi talabalarning 60% qismi ishga joylashish imkonini berishini, universitet “yashil universitet” maqomini olganligini, O’zbekistondan hozirgi kunga qadar 250 dan ortiq talabalar ushbu universitetga o’qishga borganini va bu talabalar o’qishni bitirib O’zbekiston va Germaniyaning nufuzli kompaniyalarida ishlayotganligini ma’lum qildi.
Shundan so’ng har ikkala tomon hamkorlik memorandumini imzolashdi. Memorandumda qo’shma ta’lim dasturlari, professor-o’qituvchilarning stajirovka va malaka oshirishi, talabalar almashinuv dasturlari bo’yicha o’qishi, birgalikda ilmiy tadqiqot olib borish va xalqaro nufuzli jurnallarda maqola chop ettirish, ilmiy seminarlar va konferensiyalar tashkil etish, o’quv materillari almashinuvini rivojlantirish kabi aloqalar qayd etilgan.
Mehmonlarga esdalik sovg’alari berildi. Mehmonlar filialda talabalarga malakali ta’lim olishi uchun yaratilgan sharoitlar, jumladan o’quv laboratoriya xonalari, kompyuter xonalari va kutubxona imkoniyatlari bilan yaqindan tanishishdi.