14 - Декабрь 2021
Bolaligim - beg'uborligim!
Yerga yumaladi ohista uchib,
Xazonga aylangan daraxt yaprog'i.
Yoz ham qochdi, ortdan quvlab yetdi kuz,
O'tar ekan, bari o'tkinchi chog'i.
Bosgan yo'llarimning izi sovibdi,
Xatolarim eslab, juda og'rindim.
Ayb ham ortar inson ulg'aygan sari,
Beg'ubor bolalik seni sog'indim.
Aslo bilmas edim g'ussa neligin,
Ko'ngil sho'xliklarga cho'zar edi qo'l.
Soddalik, shodonlik ufurib turgan
Murg'ak vujudimda ochgandim bir yo'l.
Bu yo'lki, atrofi maqsadlarga boy
Ikki chegarasi - andisha izi.
Shu yo'lki, iymonning ostiga ko'prik,
To'g'riga yo'llovchi haqiqat ko'zi.
Asta odimlarman manzilim tomon,
Bolaligim yodga olarman takror.
Bilsam-da, baribir istaydi bu dil
Beozor damlarim qaytishin bir bor.
Muallif: Iroda Baymuradova