Toshkent davlat iqtisodiyot universiteti Samarqand filiali professor-o’qituvchilari hamda talaba-yoshlariga 2017-2019 yillar davomida oliy ta’lim sohasida sodir etilgan korrupsiyaga oid jinoyatlar va statistik ma’lumotlar bo’yicha davra suhbati o'tkazildi.

Yig'ilganlar Korrupsiya – bu jamiyatni turli yo’llar bilan iskanjaga oladigan dahshatli illat ekanligini ta'kidlashdi. Jumladan tadbir davomida Korrupsiya demokratiya va huquq ustuvorligi asoslariga putur yetkazishi, inson huquqlari buzilishiga olib kelishi, hamda bozorlar faoliyatiga to’sqinlik qiladi, hayot sifatini yomonlashtiradi va odamlar xavfsizligiga tahdid soladigan uyushgan jinoyatchilik, terrorizm va boshqa hodisalar ildiz otib, gullashi uchun sharoit yaratib berishi to’g’risida ta’kidlab o’tildi. Shundan so’ng so’z navbatini Samarqand davlat universiteti professori F.Nabiyevga berdi.

-Korrupsiya deb atalmish balo davlatchilik shakllarining har qanday ko’rinishida insoniyatning ma’naviy va moddiy taraqqiyotiga bolta urib kelayotgan o’ta ijtimoiy illat sifatida juda katta to’siq bo’lib kelmoqda. O’rni kelganda ta’kidlash kerakki, bugungi kunda ham insoniyatni tashvishga solayotgan eng global muammolardan biri – korrupsiya balosidir.

Korrupsiya – lotincha so’z bo’lib, “pora berib sotib olish” ma’nosini anglatadi. Mansabdor shaxslar tomonidan ularga berilgan huquq va imkoniyatlardan shaxsiy boylik orttirish maqsadida foydalanishni ifodalovchi siyosiy yoki davlat boshqaruvi sohasidagi jinoiy faoliyat tushuniladi, deydi Samarqand davlat universiteti professori F.Nabiyev

Bugungi kunda mamlakatimizda korrupsiyaga qarshi kurashish davlat siyosatining eng ustuvor yo’nalishlaridan biri hisoblanadi. Davlatimiz rahbari Shavkat Mirziyoyev juda ko’plab ma’ruza va chiqishlarida loqaydlik, beparvolik, poraxo’rlik, korrupsiya, soxtakorlik, mansab vakolatni suiste’mol qilishga qarshi kurash butun jamiyatning maqsadiga aylanishi kerakligi to’g’risida gapiradilar va huquqni muhofaza qilish organlari mutasaddilariga asosiy vazifa sifatida qo’yadi. Jamiyat taraqqiyoti kushandasi bo’lgan ushbu illatga qarshi kurashish yo’lida ayovsiz kurash olib borilayotgani o’zining samarasini ham bermoqda ekanligi to’g’risida gapirib o’tdilar 

Samarqand viloyat IIB Korrupsiyaga qarshi kurashish bo'lim boshlig’i B.Inoqov-o’z so’zida Korrupsiyaga qarshi kurashish respublika idoralararo komissiyasi tomonidan tayyorlangan tahliliy ma’lumotlarga e’tibor qaratadigan bo’lsak, O’zbekistonda 2017 yilning birinchi yarim yili davomida korrupsiyaga aloqadorlikda gumon qilingan 1566 nafar mansabdor shaxsga nisbatan 1130ta jinoiy ish qo’zg’atilgan. Sud organlariga 1442 nafar mansabdor shaxsga nisbatan 954ta jinoyat ishlari yuborilgan. Ushbu ko’rsatkich o’tgan yilga nisbatan 23 foizga, qo’zg’atilgan jinoiy ishlar soni esa 22 foizga kamaygan. Shuningdek, korrupsiya jinoyatlari natijasida yetkazilgan zararning 77 foizi undirib olingan. Korrupsiyaga aloqador bo’lgan jinoyatlarning tahlili shuni ko’rsatdiki, bu turdagi barcha jinoyatlar soni kamaygan. Jumladan, Jinoyat kodeksining 207-moddasi mansabga sovuqqonlik bilan qarash – 39 foizga, 209-moddasi mansab soxtakorligi – 38 foizga, 167-moddasi o’zlashtirish yoki rastrata yo’li bilan talon-toroj qilish – 37 foizga, 205-moddasi hokimiyat yoki mansab vakolatini suiiste’mol qilish – 35 foizga, 206-moddasi hokimiyat yoki mansab vakolatidan chetga chiqish – 31 foizga, 210-212-moddalari pora olish, berish va olish-berishda vositachilik qilish – 13 foizga kamaygan. Lekin, korrupsiyaga qarshi kurashish borasida hali qilinishi kerak bo’lgan ishlar talaygina,deydi Samarqand viloyat IIB Korrupsiyaga qarshi kurashish bo'lim boshlig’i B.Inoqov

Tadbir so’nggida talabalar tomonidan berilgan savollarga mutaxassislar javob berdilar.

Talaba-yoshlar tomonidan tadbir tashkilotchilariga minnatdorchilik bildirilib, buyuk kelajakni qurish yo’lida oliy maqsadlar sari og’ishmay mehnat qilishlari haqida gapirdilar.